رائل بحرین نیول فورس کے کمانڈر کا نیول ہیڈ کوارٹرز اسلام آباد کا دورہ، پاک بحریہ کے سربراہ سے ملاقات

رائل بحرین نیول فورس کے کمانڈر رئیر ایڈمرل احمد محمد ابراہیم آل بن علی نے نیول ہیڈ کوارٹرز اسلام آباد کا دورہ کیا۔ دورے کے دوران کمانڈر رائل بحرین نیول فورس نے پاک بحریہ کے سربراہ ایڈمرل نوید اشرف سے ملاقات کی۔

نیول ہیڈ کوارٹرز آمد پر سربراہ پاک بحریہ نے معزز مہمان کا پرتپاک استقبال کیا جبکہ پاک بحریہ کے چاق و چوبند دستے نے انہیں گارڈ آف آنر پیش کیا۔اس موقع پر معزز مہمان نے پاک بحریہ کے شہداء کو خراجِ عقیدت پیش کرنے کے لیے یادگارِ شہداء پر پھولوں کی چادر چڑھائی۔ملاقات کے دوران باہمی دلچسپی کے امور، بحری تعاون اور پیشہ ورانہ روابط کو مزید مضبوط بنانے پر تبادلۂ خیال کیا گیا۔ دونوں فریقین نے دوطرفہ بحری تعاون کو فروغ دینے کے عزم کا اعادہ کیا۔

دونوں فریقین نے بحری افواج کے مابین پیشہ ورانہ روابط اور دفاعی تعاون کو مزید فروغ دینے کے عزم کا اعادہ کیا۔

یہ دورہ پاکستان اور بحرین کے مابین مضبوط اور دوستانہ تعلقات کی عکاسی کرتا ہے اور خطے میں امن و استحکام کے فروغ کے لیے دونوں ممالک کے مشترکہ عزم کو اجاگر کرتا ہے۔