کوہاٹ: گمبٹ میں سونا نکالنے کے دوران مٹی کا تودہ گرنے سے 3 مزدور جاں بحق ہو گئے، پولیس

خیبرپختونخوا کے ضلع کوہاٹ کی تحصیل گمبٹ کے علاقے درہ بوکاچ میں سونے کی غیر قانونی کان کنی کے دوران مٹی کا تودہ گرنے سے 3 مزدور ملبے تلے دب کر جاں بحق ہو گئے جن کی لاشیں نکال کر مقامی اسپتال منتقل کر دی گئی ہیں، جبکہ اس سے قبل رواں برس جنوری میں بھی اسی تحصیل میں ایسے ہی ایک حادثے میں 8 افراد جان کی بازی ہار گئے تھے۔ یہ افسوسناک واقعہ ایک ایسے وقت میں پیش آیا ہے جب گزشتہ روز ہی گورنر خیبرپختونخوا فیصل کریم کنڈی نے انکشاف کیا تھا کہ کوہاٹ میں دریائے سندھ کے کنارے سے ماہانہ 90 کلوگرام سونا غیر قانونی طور پر نکالا جا رہا ہے جس میں مختلف جماعتوں سے وابستہ 12 سیاست دان بھی ملوث ہیں، اور بدھ کے روز اسی مافیا کے خلاف آپریشن سے واپسی پر پولیس پارٹی پر حملے میں ڈی ایس پی سمیت 10 اہلکار شہید جبکہ جوابی کارروائی میں 18 حملہ آور مارے گئے تھے۔ گورنر کی جانب سے صوبے میں سونے کی کان کنی کے تمام لیز معاہدے منسوخ کرنے اور غیر قانونی مشینری ہٹانے کے انتباہ کے بعد خیبرپختونخوا پولیس اور ضلعی انتظامیہ نے نوشہرہ اور کوہاٹ میں غیر قانونی سونے کی کان کنی مافیا کے خلاف بڑے پیمانے پر کارروائی کرتے ہوئے وہاں موجود تمام بھاری مشینری کو نذرِ آتش کر دیا ہے۔