پی ٹی آئی کے غیر قانونی مطالبات اور بلیک میلنگ کے ساتھ مذاکرات نہیں ہو سکتے، وزیر اعظم

وزیراعظم شہباز شریف نے کہا ہے کہ اگر پی ٹی آئی سنجیدہ مذاکرات کے لیے تیار ہے تو حکومتِ پاکستان بھی بات چیت کے لیے تیار ہے، تاہم غیر قانونی مطالبات اور بلیک میلنگ کے ساتھ مذاکرات ممکن نہیں۔

وفاقی کابینہ کے اجلاس میں گفتگو کرتے ہوئے وزیراعظم کا کہنا تھا کہ ان دنوں پی ٹی آئی اور اس کے ساتھی ڈائیلاگ کی بات کر رہے ہیں، اگر وہ واقعی سنجیدہ ہیں تو حکومت بھی مذاکرات کے لیے تیار ہے۔ انہوں نے واضح کیا کہ صرف جائز معاملات کی بنیاد پر ہی مذاکرات آگے بڑھ سکتے ہیں۔

وزیراعظم شہباز شریف نے کہا کہ وہ اس حوالے سے قومی اسمبلی میں بھی متعدد بار اپنا مؤقف دہرا چکے ہیں۔ ان کا کہنا تھا کہ پاکستان کی ترقی اور خوشحالی کے لیے تمام سیاسی جماعتوں کے درمیان ہم آہنگی اور مفاہمت ناگزیر ہے۔