ایئر بلیو حادثہ کیس: عدالت کا بڑا فیصلہ، تمام اپیلیں خارج ہرجانہ ادا کرنے کا حکم

اسلام آباد میں 2010 کے ایئر بلیو طیارہ حادثے سے متعلق نقصانات کے معاوضے کے سول دعوؤں پر عدالت نے فیصلہ سنا دیا۔ ایڈیشنل ڈسٹرکٹ اینڈ سیشن جج ڈاکٹر رسول بخش میرجت نے ایئر بلیو کی تمام 8 اپیلیں خارج کرتے ہوئے کمپنی پر فی اپیل ایک لاکھ روپے، مجموعی طور پر 80 لاکھ روپے جرمانہ عائد کر دیا۔

عدالت نے ایئر بلیو کو مجموعی طور پر 5 ارب 41 کروڑ 78 ہزار روپے متاثرین کو ادا کرنے کا حکم دیا۔ عدالت نے متاثرین کی 8 اور ایئر بلیو کی 8 اپیلوں پر تحریری فیصلے جاری کیے۔

فیصلے کے مطابق متاثرہ سمیرا نوید چوہدری اور دو دیگر کو 143.189 ملین روپے، راشد ذوالفقار اور چار دیگر کو 630.94 ملین روپے، محمد الیاس کو 1101.868 ملین روپے بطور ہرجانہ ادا کرنے کا حکم دیا گیا۔ اسی طرح گوہر رحمان کو 507.348 ملین، جنید الزماں حامد کو 996.048 ملین، محمد جاوید خان کو 857.025 ملین، سلیمہ راجپوت کو 572.666 ملین اور کرنل (ر) شمیم اختر کو 606 ملین روپے ہرجانہ ادا کرنے کا حکم دیا گیا۔

عدالت نے قرار دیا کہ ایئر بلیو نے غیر ضروری درخواست بازی کر کے عدالتی وقت ضائع کیا، جس پر جرمانہ عائد کیا گیا۔ واضح رہے کہ سول جج نے پہلے فیصلوں میں فی کس ایک کروڑ روپے تک معاوضے کی حد مقرر کی تھی، جس کے خلاف متاثرین نے اپیلیں دائر کی تھیں۔ بعد ازاں ہائیکورٹ نے یہ اپیلیں واپس سیشن ججز کے دائرہ اختیار میں بھیج دی تھیں۔