آبنائے ہرمز میں بارودی سرنگ سے ٹکرانے کے بعد جہاز میں آگ لگ گئی

ایران کے پاسدارانِ انقلاب (نیوی) نے دعویٰ کیا ہے کہ آبنائے ہرمز کے مشرقی حصے میں ایل این جی بردار ایک جہاز ایرانی بحری بارودی سرنگ سے ٹکرا گیا، جس کے نتیجے میں شدید دھماکہ ہوا اور جہاز میں آگ بھڑک اٹھی۔ آئی آر جی سی نیوی کی جانب سے جاری بیان میں کہا گیا ہے کہ بار بار وارننگ جاری کیے جانے کے باوجود مذکورہ جہاز نے امریکی لڑاکا طیاروں کی مدد سے آبنائے ہرمز کے ایک ایسے جنوبی راستے سے گزرنے کی کوشش کی جسے ایران نے غیر مجاز اور خطرناک قرار دے رکھا ہے، جس کے چند گھنٹے بعد یہ واقعہ پیش آیا، تاہم آزاد بحری نگرانی کے اداروں کی جانب سے تاحال اس واقعے کی تصدیق نہیں ہو سکی ہے۔ پاسدارانِ انقلاب نے سخت انتباہ جاری کرتے ہوئے کہا ہے کہ آبنائے ہرمز میں ایرانی ضوابط اور ٹریفک کنٹرول سینٹر کی ہدایات نظر انداز کر کے غیر مجاز راستے اختیار کرنے والے دیگر جہازوں کو بھی اسی طرح کے سنگین نتائج کا سامنا کرنا پڑ سکتا ہے، جبکہ ایران کا واضح مؤقف ہے کہ خطے سے گزرنے والے تمام بحری جہاز صرف اس کے مقرر کردہ محفوظ راستے ہی استعمال کریں۔