مولانا فضل الرحمان کو دہشتگردی بارے سوچ کر بات کرنی چاہئے: ملک احمد خان

سپیکر پنجاب اسمبلی ملک محمد احمد خان نے کہا ہے کہ انہوں نے مولانا فضل الرحمان کو ہمیشہ ایک جاندار مقرر کے طور پر دیکھا ہے تاہم دہشت گردی کے حساس معاملے پر انہیں سوچ سمجھ کر بات کرنی چاہیے، کیونکہ جن عناصر کو ہم خارجی کہہ رہے ہیں ان کے واضح نشانات موجود ہیں۔ لاہور ایکسپو سینٹر میں میڈیا سے گفتگو کرتے ہوئے ان کا کہنا تھا کہ 1973ء کے آئین میں واضح درج ہے کہ اختیارات کی طاقت عوام کے پاس ہونی چاہیے، اس لیے وفاقی وزیرِ داخلہ کی تجویز کے مطابق نئے صوبوں کے قیام پر ریفرنڈم کرا لینا چاہیے؛ اگر سندھ یا کسی بھی خطے کے عوام چاہتے ہیں کہ نئے صوبے بنیں تو بنا دیے جائیں اور اگر وہ انکار کریں تو نہ بنائے جائیں۔ ملک محمد احمد خان نے مزید کہا کہ اب ذاتیات کی بحث ختم ہوتی جا رہی ہے اور اصل توجہ عوامی مسائل، وسائل کی منصفانہ تقسیم اور دہشت گردی کے خاتمے پر ہونی چاہیے، جبکہ کتب بینی کے فروغ اور تعلیمی ترقی کے لیے حکومتوں کو کتابوں پر عائد ٹیکسز میں کمی کرنی چاہیے۔