پنجاب ترقی کر رہا ہے اس لیے کچھ لوگوں کو ڈر لگ رہا ہے: عظمیٰ بخاری

وزیرِ اطلاعات پنجاب عظمیٰ بخاری نے کہا ہے کہ پنجاب تیزی سے ترقی کر رہا ہے جس کی وجہ سے بعض حلقوں کو خوف محسوس ہو رہا ہے، جبکہ وزیراعلیٰ پنجاب مریم نواز نے گڈ گورننس، شفافیت اور میرٹ کو پنجاب کا ماڈل بنا دیا ہے جو اب دوسرے صوبوں کے لیے بھی ایک مثال بن چکا ہے۔ اپنے ایک بیان میں صوبائی وزیرِ اطلاعات کا کہنا تھا کہ مریم نواز نے گزشتہ دو سال میں پنجاب میں ایسے ترقیاتی و فلاحی کام کیے ہیں جو ملکی تاریخ میں کوئی اور نہیں کر سکا اور صوبے کے عوام نے انہیں کھلے دل سے تسلیم کر لیا ہے۔ مخالفین پر تنقید کرتے ہوئے عظمیٰ بخاری نے مؤقف اختیار کیا کہ جعلی بیانیے بنانے والے قصہ پارینہ بن چکے ہیں اور اب مردہ گھوڑے میں ہوا بھرنے کی کوئی کوشش کامیاب نہیں ہوگی، کیونکہ نہ تو جادو ٹونے سے حکومتیں چلتی ہیں اور نہ ہی جھوٹ اور پروپیگنڈے سے حکومتیں گرتی ہیں۔ انہوں نے مزید کہا کہ کچھ بیروزگار اور سیاسی عناصر نئے ٹھکانے تلاش کرنے کے لیے ہاتھ پاؤں مار رہے ہیں اور مریم نواز کو تنقید کا نشانہ بنا کر خود کو اہم ثابت کرنے کی کوشش کر رہے ہیں۔