فن لینڈ کا روسی کھلاڑیوں سمیت شہریوں کے ملک میں داخلے پر پابندیاں عائد کرنے کا فیصلہ

فن لینڈ کی حکومت نے روسی شہریوں کے ملک میں داخلے سے متعلق نئی اور سخت پابندیاں عائد کرنے کا فیصلہ کیا ہے، جن کا باضابطہ اطلاق 16 نومبر 2026 سے ہوگا۔

حکومتی فیصلے کے تحت روسی کھلاڑیوں سمیت مختصر مدت کے لیے کام یا روزگار کی غرض سے فن لینڈ آنے والے دیگر روسی شہریوں کا داخلہ بھی محدود کیا جائے گا۔ فن لینڈ کی حکومت کا کہنا ہے کہ روسی کھلاڑیوں کی ملک میں آمد سے اس کے بین الاقوامی تعلقات اور سفارتی ساکھ متاثر ہونے کا شدید خدشہ ہے۔ حکام نے واضح کیا ہے کہ نئی پابندیاں محض کھیلوں کے شعبے سے وابستہ افراد تک محدود نہیں ہوں گی بلکہ قلیل مدتی روزگار کے لیے آنے والے تمام روسی شہری بھی ان پابندیوں کے دائرے میں شامل ہوں گے۔

واضح رہے کہ فن لینڈ کی وزیر خارجہ ایلینا والٹونن نے گزشتہ ہفتے اعلان کیا تھا کہ حکومت روسی شہریوں کے داخلے سے متعلق موجودہ پالیسی میں اہم ترمیم کرے گی، جسے آخری مرتبہ سال 2023 کے موسمِ گرما میں اپ ڈیٹ کیا گیا تھا۔ یاد رہے کہ فن لینڈ پہلے ہی روسی شہریوں کے غیر ضروری سفر اور سیاحت پر پابندیاں عائد کر چکا ہے، تاہم انسانی ہمدردی اور ضروری بنیادوں پر بعض استثنیٰ بدستور برقرار رکھے گئے ہیں، جن میں فن لینڈ میں مستقل رہائش پذیر روسی شہریوں کے اہلِ خانہ، ٹرانسپورٹ ورکرز، کاروباری افراد اور اپنے ملکیتی اثاثوں کی دیکھ بھال کے لیے آنے والے افراد شامل ہیں۔