پاکستان کے معدنی شعبے میں اہم پیش رفت، تانبے اور سونے کی تلاش کا معاہدہ طے

پاکستان منرلز انویسٹمنٹ فورم کے موقع پر ملک کے معدنی شعبے میں اہم پیش رفت سامنے آئی ہے جہاں وفاقی وزیر پٹرولیم علی پرویز ملک کی موجودگی میں آئیون ہو مائنز اور ماڑی منرلز کے درمیان بلوچستان کے ضلع چاغی میں تانبے اور سونے کے ذخائر کی تلاش اور معدنی وسائل کی استعداد کا جائزہ لینے کا معاہدہ طے پا گیا ہے۔ فورم کے موقع پر وفاقی وزیر پٹرولیم نے عالمی مائننگ اور سرمایہ کاری کمپنیوں کے سربراہان سے اہم ملاقاتیں بھی کیں، جن میں بیرک کارپوریشن کے چیئرمین جان تھورنٹن، برطانیہ کی مائننگ و انجینئرنگ کمپنی وئیر کے سی ای او اینڈریو نیلسن، عالمی کمپنی ٹریفگورا کے ہیڈ آف میٹلز اینڈ منرلز (مینا) ابراہیم الجزار، ترکیہ کی کمپنی چالک ہولڈنگ کے سی ای او مصطفیٰ آکسوئے اور آئیون ہو مائنز کے سربراہ رابرٹ فریڈلینڈ شامل تھے۔ ملاقاتوں کے دوران وئیر نے ریکوڈک سمیت دیگر معدنی منصوبوں میں شمولیت بڑھانے جبکہ ٹریفگورا نے زنک، بیرایٹ، ایل پی جی، بانڈڈ اسٹوریج اور ریفائنری کے شعبوں میں سرمایہ کاری پر گہری دلچسپی کا اظہار کیا، جس پر وفاقی وزیر علی پرویز ملک نے کہا کہ یہ فورم عالمی سرمایہ کاروں کو پاکستان کے معدنی وسائل سے جوڑنے کا مؤثر پلیٹ فارم ثابت ہو رہا ہے۔