دھند کے باعث موٹرویز بند، لاہور سے ہرن مینار اور فیض پور سے جڑانوالہ تک ٹریفک معطل

شدید دھند کے باعث موٹروے ایم ٹو لاہور سے ہرن مینار تک ہر قسم کی ٹریفک کے لیے بند کر دی گئی ہے۔ ترجمان سنٹرل ریجن کے مطابق حدِ نگاہ انتہائی کم ہونے کے باعث یہ فیصلہ مسافروں کی حفاظت کو مدنظر رکھتے ہوئے کیا گیا ہے۔

اسی طرح موٹروے ایم تھری فیض پور سے جڑانوالہ تک بھی دھند کے باعث بند کر دی گئی ہے۔ ترجمان سنٹرل ریجن کا کہنا ہے کہ موٹرویز پر سفر کرنے والے شہری غیر ضروری سفر سے گریز کریں اور بہتر حدِ نگاہ بحال ہونے تک محفوظ مقامات پر قیام کریں۔

موٹروے پولیس نے شہریوں کو ہدایت کی ہے کہ دورانِ سفر فوگ لائٹس کا استعمال کریں، مناسب رفتار رکھیں اور گاڑیوں کے درمیان محفوظ فاصلہ برقرار رکھیں۔