دہشت گردوں کے ناپاک عزائم کسی صورت کامیاب نہیں ہونے دیں گے: وزیراعظم

وزیراعظم محمد شہباز شریف نے کہا ہے کہ پاکستان کے امن و استحکام پر ہرگز کوئی سمجھوتہ نہیں کیا جائے گا اور ملک سے دہشت گردی کے عفریت کے مکمل خاتمے کے لیے حکومت پوری طرح پرعزم ہے۔

وزیراعظم محمد شہباز شریف نے کوہاٹ میں دہشت گردوں کے بزدلانہ حملے کی شدید الفاظ میں مذمت کی ہے اور حملے میں جامِ شہادت نوش کرنے والے ڈی ایس پی حیدر زمان سمیت 10 پولیس اہلکاروں کو شاندار خراجِ عقیدت پیش کرتے ہوئے شہدا کے لواحقین سے دلی ہمدردی اور تعزیت کا اظہار کیا ہے۔ وزیراعظم کا کہنا تھا کہ بہادر پولیس جوانوں نے اپنی جانوں کا نذرانہ پیش کر کے فرض شناسی اور شجاعت کی عظیم مثال قائم کی ہے، اور سکیورٹی فورسز کی جوابی کارروائی میں 18 خوارج کا ہلاک ہونا خیبر پختونخوا پولیس کے دہشت گردی کے خلاف غیر متزلزل عزم کا واضح مظہر ہے۔

وزیراعظم نے اس امر پر زور دیا کہ جرائم پیشہ عناصر اور ‘فتنہ الخوارج’ کا گٹھ جوڑ ملک میں بدامنی پھیلانے کی ایک مذموم کوشش ہے، لیکن ایسے عناصر کو ان کے ناپاک عزائم میں کسی صورت کامیاب نہیں ہونے دیا جائے گا۔

واضح رہے کہ خیبر پختونخوا پولیس اور مقامی سول انتظامیہ نے کوہاٹ کے قریب درابوکچ میں غیر قانونی سونے کی مائننگ کرنے والے عناصر کے خلاف ایک گرینڈ آپریشن کیا تھا۔ آپریشن کامیابی سے مکمل کرنے کے بعد جب پولیس پارٹی واپس لوٹ رہی تھی تو جرائم پیشہ عناصر کے ایماء پر چھپے ہوئے ‘فتنہ الخوارج’ کے دہشت گردوں نے حملہ کر دیا۔ پولیس کے جوانوں نے انتہائی بہادری اور جواں مردی سے حملہ آوروں کا مقابلہ کیا، جس کے نتیجے میں 18 خوارج جہنم واصل ہو گئے، جبکہ مادرِ وطن کا دفاع کرتے ہوئے خیبر پختونخوا پولیس کے ڈی ایس پی سمیت 10 جوانوں نے جامِ شہادت نوش کیا۔ حکام کا کہنا ہے کہ بیرونی طاقتوں کے ایماء پر جرائم پیشہ عناصر اور دہشت گردوں کا یہ باہمی گٹھ جوڑ اس بات کا بین ثبوت ہے کہ ملک دشمن عناصر قانون کی رٹ کو چیلنج کرنے کی ناکام کوشش کر رہے ہیں۔