ایران امن چاہتا ہے، امریکا ہمارے مطالبات تسلیم کرے، ایرانی اسپیکر باقر قالیباف

ایرانی پارلیمنٹ کے اسپیکر محمد باقر قالیباف نے کہا ہے کہ ایران خطے میں امن چاہتا ہے اور جنگ جاری رکھنے کا خواہشمند نہیں ہے، تاہم پائیدار امن کے لیے امریکا کو ایران کے جائز مطالبات تسلیم کرنا ہوں گے۔

قطری نشریاتی ادارے ‘الجزیرہ’ کو دیے گئے ایک خصوصی انٹرویو میں باقر قالیباف کا کہنا تھا کہ تہران نے واشنگٹن کو اپنے مطالبات سے متعلق واضح اور شفاف جواب بھجوا دیا ہے، تاہم امریکا کی جانب سے تاحال ایرانی پیغام کا کوئی باضابطہ ردِعمل سامنے نہیں آیا۔ انہوں نے انکشاف کیا کہ ایران کے پیش کردہ 7 بنیادی مطالبات میں آبنائے ہرمز سے متعلق نئی شرائط بھی شامل ہیں۔ ان کا دوٹوک مؤقف تھا کہ آبنائے ہرمز اب جنگ سے پہلے والی پرانی صورتحال پر واپس نہیں آئے گی، بلکہ اس اہم آبی گزرگاہ کے مستقبل کا تعین ایران اور عمان کے درمیان بحری آمدورفت کے نئے نظام سے متعلق اتفاقِ رائے کے تحت کیا جائے گا۔

ایرانی اسپیکر نے مزید کہا کہ مجوزہ مفاہمتی یادداشت کی ایک کلیدی شق مزاحمتی محاذ کے خلاف جاری جنگ کا مکمل خاتمہ ہے، اور اگر امریکا یا اسرائیل نے دوبارہ جارحیت اور جنگ کا آغاز کیا تو ایران ان دونوں کا بھرپور قوت سے مل کر مقابلہ کرے گا۔ انہوں نے خبردار کیا کہ جنگ کے طویل ہونے سے پورے خطے کے ممالک کی سلامتی اور معیشت بری طرح متاثر ہوگی، جبکہ ایران اور مزاحمتی قوتیں ایک ہی صف میں کھڑی ہیں اور تہران اپنے اصولی مؤقف پر چٹان کی طرح قائم ہے۔

یمن کی صورتحال پر بات کرتے ہوئے باقر قالیباف نے کہا کہ اگر سعودی عرب اور حوثی چاہیں تو ایران ان کے درمیان اختلافات ختم کرانے اور مصالحت کے لیے اپنا کردار ادا کرنے کو تیار ہے، تاہم انہوں نے اس بات پر زور دیا کہ یمن کے اندرونی معاملات میں کسی بیرونی طاقت کو مداخلت نہیں کرنی چاہیے اور یمنی عوام کو اپنے مسائل کا حل خود تلاش کرنے دیا جائے