امریکا نے یورپ سے سکیورٹی معاہدے کیلئے روس سے تجاویز طلب کر لیں، ایگزیوس

امریکا نے یورپ کے ساتھ نئے سکیورٹی معاہدے کے امکانات پر روس سے باضابطہ تجاویز طلب کر لی ہیں، جبکہ اس سلسلے میں امریکی ایلچی جیرڈ کشنر اور اسٹیو وٹکوف آج ماسکو میں روسی صدر ولادیمیر پیوٹن سے اہم ملاقات کریں گے۔

امریکی حکام کے مطابق واشنگٹن چاہتا ہے کہ ماسکو یورپ کے ساتھ جاری کشیدگی میں کمی لانے کے لیے ٹھوس اقدامات تجویز کرے اور یوکرین امن مذاکرات میں یورپی ممالک کو بھی شامل کرنے پر آمادگی ظاہر کرے۔ سفارتی ذرائع کا کہنا ہے کہ امریکی ایلچی ماسکو کے دورے کی تکمیل کے بعد ڈبلن روانہ ہوں گے جہاں وہ یوکرینی صدر سے بھی ملاقات کر کے مذاکرات کی پیش رفت سے آگاہ کریں گے۔

امریکی انتظامیہ کی خواہش ہے کہ یوکرین جنگ کے خاتمے کے لیے جاری مذاکرات اور یورپ و روس کے درمیان نئے سکیورٹی نظام کی تشکیل پر بیک وقت بات چیت آگے بڑھائی جائے، تاہم واشنگٹن نے واضح کیا ہے کہ کسی بھی نئے سکیورٹی معاہدے پر عملی درآمد یوکرین جنگ کے مکمل خاتمے کے بعد ہی ممکن ہو سکے گا۔ امریکی خبر رساں ادارے ‘ایگزیوس’ (Axios) کی رپورٹ کے مطابق روس بھی یورپ کے ساتھ سکیورٹی معاہدہ کرنے کا خواہشمند ہے، لیکن مجوزہ معاہدے کے بنیادی خدوخال اور شرائط پر فریقین کے درمیان تاحال اختلافات موجود ہیں۔

دوسری جانب امریکی حکام نے دوٹوک مؤقف اپناتے ہوئے واضح کیا ہے کہ واشنگٹن یورپی اتحادیوں اور یوکرین کی رضامندی کے بغیر روس کے ساتھ ہرگز کوئی سکیورٹی معاہدہ نہیں کرے گا، اور نہ ہی یورپ کی سلامتی سے متعلق معاملات میں روس کو ویٹو کا کوئی اختیار دیا جائے گا۔ امریکی سفارت کاری کا بنیادی ہدف یورپی نمائندوں کو یوکرین مذاکرات میں شریک کر کے مستقبل کے سکیورٹی انتظامات پر وسیع تر اتفاقِ رائے پیدا کرنا ہے۔