اسرائیل کے حملے میں غزہ کا فٹبالر محمود کمال شہید

غزہ میں اسرائیلی فورسز کے وحشیانہ حملے کے نتیجے میں معروف فلسطینی فٹبالر محمود کمال شہید ہو گئے ہیں۔

فلسطینی ذرائع کے مطابق شہید ہونے والے محمود کمال غزہ اسپورٹس کلب کے مایہ ناز گول کیپر تھے۔ قابلِ ذکر امر یہ ہے کہ محمود کمال کی ٹیم نے محض چند روز قبل ہی شہید فلسطینی کھلاڑیوں کی یاد میں منعقد کیے گئے ایک مقامی فٹبال ٹورنامنٹ میں دوسری پوزیشن حاصل کی تھی۔ اعداد و شمار کے مطابق غزہ پر جاری اسرائیلی جارحیت اور حملوں میں اب تک کم و بیش 1,000 فلسطینی کھلاڑی شہید ہو چکے ہیں۔

دوسری جانب برطانوی اسٹار فارمولا ون ڈرائیور لوئس ہیملٹن نے مصر اور غزہ کی سرحد پر واقع رفح کراسنگ کا دورہ کیا اور غزہ کے متاثرین کے لیے جاری امدادی سرگرمیوں کا تفصیلی جائزہ لیا۔ اس موقع پر گفتگو کرتے ہوئے لوئس ہیملٹن نے انسانی ہمدردی کی بنیاد پر فوری اقدامات کی ضرورت پر زور دیا اور مطالبہ کیا کہ عالمی برادری خطے میں پائیدار قیامِ امن کے لیے اپنی کوششیں تیز کرے۔