پنجاب میں نیا سیاسی ارینجمنٹ کرنا ہے تو کر لیں ہم تیار ہیں: عظمیٰ بخاری

صوبائی وزیرِ اطلاعات پنجاب عظمیٰ بخاری نے کہا ہے کہ اگر پنجاب میں کوئی نیا سیاسی ارینجمنٹ کرنا چاہتا ہے تو ضرور کر لے، ہم اس کے لیے مکمل طور پر تیار ہیں۔

نجی ٹی وی چینل کے پروگرام ‘دنیا مہر بخاری کے ساتھ’ میں گفتگو کرتے ہوئے وزیر اطلاعات پنجاب عظمیٰ بخاری کا کہنا تھا کہ بعض کاروباری شخصیات کی یہ خواہش ہے کہ ان کے نام کے ساتھ بھی ‘وزیراعلیٰ’ کا عہدہ لکھا جائے۔ انہوں نے کہا کہ وزیراعلیٰ پنجاب مریم نواز کا ہر ضلع میں ہونے والا بھرپور عوامی استقبال دیکھ کر سیاسی مخالفین شدید پریشانی اور تلملاہٹ کا شکار ہیں۔

عظمیٰ بخاری نے دعویٰ کیا کہ کچھ سیاسی عناصر اس خوف سے متحرک ہو کر باہر نکل رہے ہیں کہ انہیں اندازہ ہو چکا ہے کہ وزیراعلیٰ پنجاب کی موجودہ کارکردگی کے بعد آئندہ عام انتخابات میں ان کے لیے کوئی سیاسی گنجائش باقی نہیں رہے گی۔ پروگرام کے دوران ایک سوال کے جواب میں صوبائی وزیر اطلاعات نے کہا کہ محمود قادر نیازی کو ایسی حکومت سے خود ہی مستعفی ہو کر گھر چلے جانا چاہیے جو ان کے ذاتی مفادات کا تحفظ نہیں کر سکتی۔