ہمیشہ صحافیوں کی فلاح و بہبود کیلئے کام کیا، آزادی صحافت پر یقین رکھتے ہیں: شرجیل میمن

صوبائی وزیرِ اطلاعات سندھ شرجیل انعام میمن نے کہا ہے کہ پاکستان پیپلز پارٹی اور سندھ حکومت آزادیِ صحافت پر مکمل یقین رکھتی ہیں اور صحافی برادری کے حقوق کے تحفظ کے لیے ہمیشہ کوشاں رہی ہیں۔

کراچی پریس کلب کے باہر میڈیا نمائندوں سے گفتگو کرتے ہوئے شرجیل میمن کا کہنا تھا کہ پیپلز پارٹی نے ہر دور میں صحافیوں کی فلاح و بہبود کے لیے عملی اقدامات کیے ہیں۔ انہوں نے کہا کہ سندھ حکومت نے کبھی مثبت تنقید کا برا نہیں منایا، تاہم بعض حلقوں کی جانب سے سندھ حکومت کو بلاجواز نشانہ بنایا جاتا ہے۔

اس موقع پر گفتگو کرتے ہوئے انہوں نے کہا کہ میر رضا کیس کے معاملے پر دو سیاسی جماعتوں نے سوشل میڈیا پر منفی مہم جوئی اور مخصوص اینگلنگ کی۔ ان کا کہنا تھا کہ بغیر تصدیق کے بے بنیاد الزامات عائد کرنا صحافت نہیں ہے؛ اگر سچ کو سچ کہا جائے تو ہم بھرپور ساتھ دیں گے۔ شرجیل میمن نے مزید کہا کہ پیپلز پارٹی ہمیشہ عوام کے ووٹوں کی طاقت اور جمہوری دروازے سے اقتدار میں آتی ہے اور اس کے پاس اقتدار تک پہنچنے کا کوئی دوسرا راستہ نہیں، جبکہ ملکی ترقی کے لیے ہم سب کو مل کر آگے بڑھنا ہوگا۔