پاکستانی خلا باز چینی خلائی اسٹیشن اترنے والے پہلے غیر ملکی خلا باز ہوں گے، چینی سفارتخانہ

پاکستان اور چین کے درمیان خلائی تعاون کے ایک نئے اور تاریخی دور کا آغاز ہونے جا رہا ہے، جس کے تحت پاکستانی خلا باز چین کے خلائی اسٹیشن میں قدم رکھنے والے دنیا کے پہلے غیر ملکی خلا باز ہوں گے۔

اسلام آباد میں قائم چینی سفارتخانے کی جانب سے سماجی رابطے کی ویب سائٹ ‘ایکس’ (سابقہ ٹوئٹر) پر جاری بیان میں کہا گیا ہے کہ پاک چین مشترکہ خلائی مشن دونوں برادر ممالک کی لازوال دوستی میں ایک تاریخی سنگِ میل ثابت ہوگا۔ سفارتخانے کے مطابق پاک چین سفارتی تعلقات کے 75 سال مکمل ہونے کے موقع پر خلائی تحقیق اور تعاون کے اس نئے باب کا آغاز کیا جا رہا ہے۔

بیان میں مزید کہا گیا ہے کہ چین کے انسانی خلائی پروگرام کی تاریخ میں یہ پہلا موقع ہوگا جب چینی اور غیر ملکی خلا باز ایک ساتھ مشترکہ مشن انجام دیں گے۔ اس اہم پیش رفت سے دونوں ممالک کے درمیان جدید سائنسی و تکنیکی تعاون کے نئے امکانات روشن ہوں گے، جبکہ یہ مشترکہ خلائی مشن پاکستان کی نوجوان نسل میں سائنس و ٹیکنالوجی کے فروغ کے لیے بھی بھرپور تحریک کا باعث بنے گا۔ چینی سفارتخانے نے پاک چین دوستی کو زمین سے خلاؤں تک پہنچنے کا ایک عظیم سفر قرار دیتے ہوئے کہا کہ دونوں ممالک مشترکہ ترقی اور روشن مستقبل کی جانب تیزی سے گامزن ہیں۔