پاکستان حج مشن کو بہترین خدمات پر سعودی وزارت حج و عمرہ کا خصوصی اعزاز

سعودی وزارتِ حج و عمرہ نے چھٹی حج کانفرنس اینڈ ایکسپو 2026 کی شاندار اختتامی تقریب میں پاکستان حج مشن کو حجاج کرام کو فراہم کی جانے والی مثالی اور بہترین خدمات کے اعتراف میں خصوصی اعزاز سے نواز دیا ہے۔

یہ خصوصی اعزاز سعودی نائب وزیرِ حج و عمرہ ڈاکٹر عبداللہ فتح المشاط اور دیگر اعلیٰ سعودی حکام نے پیش کیا، جسے پاکستان حج مشن کی نمائندگی کرتے ہوئے قائم مقام ڈائریکٹر جنرل حج محمد عارف اسلم راؤ نے وصول کیا۔ تقریب میں دنیا بھر کے 150 ممالک کے وفود شریک تھے، جبکہ وفاقی وزیر برائے مذہبی امور سردار محمد یوسف کی سربراہی میں اعلیٰ سطح کے پاکستانی وفد نے کانفرنس میں شرکت کی۔ پاکستانی وفد میں سیکرٹری مذہبی امور ابرار احمد مرزا، جوائنٹ سیکرٹری حج سید عبدالوحید شاہ، ڈائریکٹر حج مدینہ زاہد سہیل اور ڈپٹی ڈائریکٹر حج عزیز اللہ خان بھی شامل تھے۔

واضح رہے کہ پاکستان دنیا کے ان چار نمایاں ممالک میں شامل تھا جن کے حج مشن سربراہان کو خصوصی طور پر اسٹیج پر مدعو کر کے ان کی شاندار انتظامات اور خدمات کے اعتراف میں اعزازات پیش کیے گئے؛ اس فہرست میں پاکستان کے علاوہ ترکی، ملائیشیا اور عراق شامل تھے۔