موٹروے پولیس نے جلتی وین سے 11 بچوں سمیت تمام مسافروں کو بحفاظت نکال لیا

نیشنل ہائی ویز اینڈ موٹروے پولیس (ایم تھری) نے بروقت اور دلیرانہ کارروائی کرتے ہوئے موٹروے پر جلتی ہوئی مسافر وین سے 11 بچوں سمیت تمام مسافروں کو بحفاظت ریسکیو کر لیا۔

تفصیلات کے مطابق لاہور سے ملتان جانے والی ایک مسافر ہائی ایس وین میں موٹروے ایم تھری پر شرقپور کے قریب تکنیکی خرابی اور شارٹ سرکٹ کے باعث اچانک شدید آگ بھڑک اٹھی۔ حادثے کے وقت گاڑی میں خواتین اور 11 بچوں سمیت متعدد مسافر سوار تھے، جس کے باعث شدید خوف و ہراس پھیل گیا۔

واقعے کی اطلاع ملتے ہی موٹروے پولیس کے افسران اور اہلکار فوری طور پر جائے وقوعہ پر پہنچ گئے۔ اہلکاروں نے انتہائی فرض شناسی اور پیشہ ورانہ مہارت کا مظاہرہ کرتے ہوئے آگ کی لپیٹ میں آئی وین سے تمام مرد، خواتین اور بچوں کو بحفاظت باہر نکال لیا، جس کی بدولت کوئی جانی نقصان نہیں ہوا اور مسافر بڑے حادثے سے محفوظ رہے۔