شہباز شریف کی کویتی ہم منصب سے ملاقات، دفاعی تعاون کے معاہدے کی توثیق کا خیرمقدم

وزیراعظم محمد شہباز شریف نے اقوامِ متحدہ کی 31ویں موسمیاتی تبدیلی کانفرنس (COP31) کے موقع پر کویت کے وزیراعظم شیخ احمد عبداللہ الاحمد الصباح سے اہم دوطرفہ ملاقات کی۔

ملاقات کے دوران دونوں رہنماؤں نے پاکستان اور کویت کے مابین دیرینہ اور برادرانہ تعلقات پر تفصیلی تبادلہ خیال کیا، جبکہ تجارت، سرمایہ کاری، توانائی، ترقیاتی شراکت داری اور عوامی روابط سمیت مختلف شعبوں میں باہمی تعاون کو مزید مستحکم بنانے کے عزم کا اعادہ کیا۔ دونوں وزرائے اعظم نے بدلتی ہوئی علاقائی و عالمی صورتحال، خطے میں امن و سلامتی کو درپیش چیلنجز، موسمیاتی تبدیلی کے منفی اثرات اور پائیدار ترقی کے لیے بین الاقوامی تعاون کی اہمیت پر بھی گفتگو کی۔

اس موقع پر پاکستان اور کویت کی جانب سے حال ہی میں طے پانے والے دفاعی تعاون کے معاہدے کی توثیق کا بھرپور خیرمقدم کیا گیا، اور دونوں رہنماؤں نے اس امید کا اظہار کیا کہ اس پیش رفت سے دونوں برادر ممالک کے درمیان اسٹریٹجک اور دوطرفہ تعاون کو نئی تقویت ملے گی۔ ملاقات کے اختتام پر تجارتی و کاروباری روابط کو وسعت دینے اور علاقائی استحکام کے مشترکہ مقاصد کے حصول کے لیے مل کر کام کرنے پر اتفاق کیا گیا۔