خاتون نیوز اینکر قتل کیس، شوہر احسن طاہر کا پولی گرافک ٹیسٹ مکمل

راولپنڈی میں خاتون نیوز اینکر ربیعہ احسن کے قتل کیس کی تحقیقات میں ایک اور اہم پیش رفت سامنے آئی ہے جہاں مقتولہ کے گرفتار شوہر احسن طاہر کا پولی گرافک (جھوٹ پکڑنے کا) ٹیسٹ مکمل کر لیا گیا ہے۔

پولیس ذرائع کے مطابق ملزم احسن طاہر کا پولی گرافک ٹیسٹ لاہور میں واقع پنجاب فرانزک سائنس لیبارٹری (PFSA) میں ماہرین کی نگرانی میں کیا گیا، جو دو گھنٹے سے زائد وقت تک جاری رہا۔ ٹیسٹ کے دوران تفتیشی ماہرین نے ملزم سے وقوعہ کے محرکات اور شواہد سے متعلق مختلف اہم سوالات کیے، جن میں خاص طور پر پستول کی الماری میں موجودگی اور گولی چلنے کے عمل سے جڑے سوالات بھی شامل تھے۔

ذرائع نے بتایا کہ ٹیسٹ کے پورے دورانیے میں ملزم کے جوابات دیتے وقت اس کے دل کی دھڑکن، بلڈ پریشر، سانس کی رفتار اور دیگر جسمانی تبدیلیوں کو سائنسی آلات کے ذریعے ریکارڈ کیا گیا۔ پولیس حکام کا کہنا ہے کہ ملزم کے بیانات اور جسمانی ردِعمل پر مبنی حتمی رپورٹ آئندہ چند روز میں مرتب کر لی جائے گی، جس کی روشنی میں ملزم کے بیانات کے سچ یا جھوٹ ہونے کا باضابطہ تعین کیا جائے گا۔