جدید، مؤثر اور مالی طور پر مستحکم ریلوے نیٹ ورک انتہائی اہم ہے: اسحاق ڈار

نائب وزیراعظم اور وزیر خارجہ اسحاق ڈار کی زیر صدارت اسلام آباد میں پاکستان ریلوے کی بحالی اور تنظیمِ نو سے متعلق تجاویز کا ایک اہم جائزہ اجلاس منعقد ہوا۔

سرکاری ترجمان کے مطابق اجلاس میں پاکستان ریلوے کے بنیادی ڈھانچے کو جدید خطوط پر استوار کرنے اور ادارے کے طویل المدتی مالی استحکام کو یقینی بنانے کے حوالے سے تفصیلی غور و خوض کیا گیا۔ اس موقع پر شرکاء نے ادارے کی تنظیمِ نو (Restructuring) کے مختلف آپشنز کا باریک بینی سے جائزہ لیا۔

اجلاس میں ریلوے منصوبوں کی تکمیل کے لیے پبلک پرائیویٹ پارٹنرشپ (PPP)، مقامی بینکوں سے فنانسنگ اور بین الاقوامی مالیاتی ذرائع سے وسائل حاصل کرنے کی تجاویز بھی زیرِ غور آئیں۔ اجلاس سے خطاب کرتے ہوئے نائب وزیراعظم اسحاق ڈار نے کہا کہ ایک جدید، مؤثر اور مالی طور پر مستحکم ریلوے نیٹ ورک قومی اقتصادی انضمام اور علاقائی روابط کے فروغ کے لیے انتہائی ناگزیر ہے۔