خیرپور کے کچے میں پولیس آپریشن، 2 ڈاکو ہلاک، 20 سے زائد گرفتار

خیرپور کے علاقے پیر جو گوٹھ کے کچے میں پولیس کے بڑے سرچ آپریشن کے دوران فائرنگ کے تبادلے میں 2 ڈاکو ہلاک جبکہ 20 سے زائد مسلح افراد کو حراست میں لے لیا گیا ہے۔

ایس ایس پی خیرپور کیپٹن (ر) عامر سعود مگسی کے مطابق پولیس نے جرائم پیشہ عناصر اور ڈاکوؤں کے خلاف کچے کے علاقے میں ٹارگٹڈ سرچ آپریشن کیا، جس کے دوران ڈاکوؤں نے پولیس نفری پر فائرنگ شروع کر دی۔ پولیس کی جانب سے کی گئی بھرپور جوابی فائرنگ کے نتیجے میں 2 ڈاکو موقع پر ہی ہلاک ہو گئے، جن کی تاحال شناخت نہیں ہو سکی ہے۔

آپریشن کے دوران پولیس نے علاقے کا محاصرہ کر کے 20 سے زائد مسلح مشتبہ افراد کو گرفتار کر لیا ہے جن سے تفتیش کا عمل جاری ہے۔ کارروائی میں ہلاک اور گرفتار ملزمان کے قبضے سے 5 کلاشنکوف رائفلیں، 2 ٹی ٹی پستول اور بڑی تعداد میں گولیاں بھی برآمد کی گئی ہیں۔ ایس ایس پی سعود مگسی کے مطابق علاقے میں امن و امان برقرار رکھنے کے لیے پولیس کی اضافی نفری تعینات کر دی گئی ہے