گرپتونت پنوں قتل سازش کیس، امریکی عدالت کا مودی حکومت کو باضابطہ نوٹس

امریکی عدالت نے سکھ رہنما گرپتونت سنگھ پنوں کے قتل کی سازش کے مقدمے میں پیش رفت کرتے ہوئے بھارتی حکومت اور اس کے اعلیٰ عہدیداروں کو باضابطہ نوٹس جاری کر دیے ہیں اور 8 دسمبر تک جواب جمع کرانے کی ہدایت کی ہے۔

عدالتی نوٹسز بھارتی قومی سلامتی کے مشیر (NSA) اجیت دوول، سابق ‘را’ (RAW) چیف سمنت گوئل، وکرم یادو اور گرفتار بھارتی شہری نکھل گپتا کے نام جاری کیے گئے ہیں۔ مقدمے کا باضابطہ سمن 9 اکتوبر کو واشنگٹن میں واقع بھارتی سفارت خانے کو موصول کرایا گیا تھا، جبکہ عدالت نے متنبہ کیا ہے کہ مقررہ تاریخ تک جواب نہ دینے پر بھارتی حکومت کے خلاف یکطرفہ فیصلہ سنایا جا سکتا ہے۔

وکیلِ استغاثہ کے مطابق بھارتی پاسپورٹ ہولڈر اور سابق افسر وکاس یادو نے نکھل گپتا کو سکھ رہنما کے قتل کا ٹاسک دیا تھا اور اس سازش کی پیشگی رقم کے طور پر ایک لاکھ ڈالر کی ادائیگی کی منظوری دی تھی۔ مقدمے میں پہلے سے گرفتار ملزم نکھل گپتا کو 20 نومبر کو سزا سنائی جائے گی۔