پاکستان میں ورچوئل اثاثہ جات الائنس کے قیام کا اعلان، ہنزہ آصف پہلی چیئرپرسن مقرر

پاکستان میں کرپٹو کرنسی صارفین، ڈیجیٹل اثاثوں کے سرمایہ کاروں اور کاروباری اداروں کے تحفظ اور باہمی تعاون کے لیے “ورچوئل اثاثہ جات الائنس آف پاکستان” (VAAP) کے باضابطہ قیام کا اعلان کر دیا گیا ہے۔

اسلام آباد میں الائنس کے رہنماؤں نے پریس کانفرنس کرتے ہوئے بتایا کہ ایشیا ویب تھری الائنس جاپان کی بانی ہنزہ آصف کو الائنس کی پہلی چیئرپرسن جبکہ ایچ ٹی ایکس کے کنٹری مینیجر سید احتشام حمدانی کو سینئر وائس چیئرمین مقرر کیا گیا ہے۔ نائب صدر سید احتشام حمدانی نے گفتگو کرتے ہوئے کہا کہ اگرچہ پاکستان کرپٹو اپنانے کے عالمی انڈیکس میں نمایاں مقام رکھتا ہے، تاہم ملک میں 2 کروڑ کرپٹو صارفین کا دعویٰ فی الوقت غیر مصدقہ ہے اور اس کے لیے آزادانہ ڈیٹا کی ضرورت ہے۔

الائنس کے رہنماؤں نے واضح کیا کہ ویپ (VAAP) کو کوئی ریگولیٹری یا حکومتی اختیارات حاصل نہیں ہیں، بلکہ اس کا بنیادی مقصد کرپٹو اور ڈیجیٹل اثاثہ جات کی صنعت سے وابستہ فریقین کے درمیان معلومات کے تبادلے، سائبر سیکیورٹی، سرمایہ کاروں کی آگاہی اور شفاف پالیسی سازی کے لیے ایک غیر جانبدارانہ پلیٹ فارم فراہم کرنا ہے