ایران کے خلاف مزید بڑے آپریشنز کی ضرورت نہیں، معاشی دباؤ بڑھائیں گے: مارکو روبیو

امریکی وزیر خارجہ مارکو روبیو نے کہا ہے کہ ایران کے خلاف مزید بڑے پیمانے پر فوجی کارروائیوں کی فی الحال ضرورت نہیں ہے، تاہم تہران پر معاشی دباؤ کی پالیسی کو مزید سخت کیا جائے گا۔

پیرس میں صحافیوں سے گفتگو کرتے ہوئے امریکی وزیر خارجہ نے دعویٰ کیا کہ ایرانی حکومت کی پالیسیاں خود اس کے اپنے ملک کے لیے تباہ کن ثابت ہو رہی ہیں۔ ان کا کہنا تھا کہ ایران کے خلاف معاشی دباؤ کی امریکی حکمت عملی کام کر رہی ہے اور بحری ناکہ بندی کے مثبت نتائج سامنے آ رہے ہیں، جبکہ آبنائے ہرمز کے ذریعے تیل کی ترسیل بلا تعطل جاری ہے۔

مارکو روبیو نے انکشاف کیا کہ ثالثوں کے ذریعے ایران کے ساتھ رابطے اور گفتگو کا سلسلہ جاری ہے اور ایران معاہدہ کرنے کا خواہش مند ہے، تاہم اس کی موجودہ شرائط ناقابلِ قبول اور حقیقت سے بعید ہیں۔ انہوں نے واضح کیا کہ ایران کی جانب سے ہرجانے کا مطالبہ تسلیم نہیں کیا جائے گا اور امریکا کسی ناقص معاہدے پر دستخط نہیں کرے گا۔ یوکرین روس تنازع کے حوالے سے بات کرتے ہوئے انہوں نے کہا کہ امریکا اور یورپ کے مقاصد بالکل ایک ہیں اور یورپی اتحادی مذاکراتی عمل کا حصہ ہیں۔