چشمہ 5 منصوبے نے مقررہ وقت سے پہلے اہم سنگ میل عبور کرلیا: وزیراعظم

وزیراعظم شہباز شریف نے چشمہ 5 (C-5) جوہری توانائی منصوبے کا مقررہ وقت سے پہلے اہم سنگ میل عبور کرنے پر اسے ملک کے لیے باعثِ فخر قرار دیتے ہوئے کہا ہے کہ پاکستان اپنی محنت، لگن اور انتھک کوششوں سے اپنا مستقبل خود تعمیر کرے گا۔ چشمہ 5 منصوبے کی تقریب سے خطاب کرتے ہوئے انہوں نے بتایا کہ 1200 میگاواٹ کی صلاحیت کا حامل یہ منصوبہ پاکستان کا سب سے بڑا اور ساتواں جوہری بجلی گھر ہے، جو چین کے تعاون سے تعمیر کیا جا رہا ہے اور عوام کو صاف، قابل اعتماد و سستی بجلی کی فراہم کرنے کا ضامن بنے گا۔ وزیراعظم نے پاک-چین ہمالیہ سے بلند دوستی، صدر شی جن پنگ کے تعاون اور چینی انجینئرز کی خدمات کی تعریف کرتے ہوئے کہا کہ سی پیک کا دوسرا مرحلہ دوطرفہ شراکت داری کو مزید مضبوط بنائے گا۔ انہوں نے معاشی بحالی، سیکیورٹی اور ملکی استحکام کے لیے مسلح افواج اور فیلڈ مارشل سید عاصم منیر کے کردار کو بھی سراہا۔