مری میں سکول ٹرپ کی بس الٹ گئی، ڈرائیور جاں بحق، 25 طلبہ و طالبات زخمی

مری میں شوالہ لنک روڈ پر موڑ کاٹتے ہوئے اسکول ٹرپ کی کوسٹر بس بے قابو ہو کر الٹ گئی، جس کے نتیجے میں ڈرائیور جاں بحق جبکہ 25 کے قریب طلبہ و طالبات زخمی ہو گئے۔ یہ حادثہ اس وقت پیش آیا جب طلبہ مری سے گوجرانوالہ واپس جا رہے تھے۔ واقعے کی اطلاع ملتے ہی ضلعی انتظامیہ، ریسکیو، پولیس اور ٹریفک اہلکار موقع پر پہنچ گئے اور زخمی بچوں کو ابتدائی طبی امداد کے بعد ٹی ایچ کیو ہسپتال منتقل کیا۔ حادثے کا نوٹس لیتے ہوئے ڈی پی او مری رضا تنویر سپرا نے ڈی ایس پی لیگل اور ڈی ایس پی ٹریفک پر مشتمل دو رکنی انکوائری کمیٹی تشکیل دے دی ہے جو گاڑی کی تکنیکی حالت، روڈ سیفٹی اور ڈرائیور کی غفلت کا جائزہ لے کر جامع رپورٹ پیش کرے گی، جبکہ لاپرواہی ثابت ہونے پر سخت قانونی کارروائی کی ہدایت کی گئی ہے۔