امریکی وزیر جنگ نے مواخذے کی کوشش کو سیاسی انتقام قرار دے دیا

امریکی وزیرِ دفاع پیٹ ہیگسیتھ نے اپنے خلاف مواخذے کی تحریک کو احتساب کے بجائے سیاسی انتقام قرار دیتے ہوئے اپنے عہدے سے مستعفی ہونے کا امکان رد کر دیا ہے۔ ایک نیوز کانفرنس سے خطاب کرتے ہوئے انہوں نے کہا کہ ان پر عائد تمام الزامات بے بنیاد ہیں اور انہیں عہدے سے ہٹانے کی کوشش دراصل امریکی فوجی اہلکاروں پر حملہ ہے۔ پیٹ ہیگسیتھ نے ایران کے خلاف امریکی ملٹری کارروائیوں کا مکمل دفاع کرتے ہوئے کہا کہ وہ اپنے فیصلوں پر قائم ہیں اور ان اقدامات پر معافی نہیں مانگیں گے، کیونکہ صدر ڈونلڈ ٹرمپ نے امریکی شہریوں کے تحفظ کے لیے بروقت اور درست فیصلے کیے۔ انہوں نے دعویٰ کیا کہ ایران کی فوجی صلاحیتیں تباہ کر کے سخت بحری ناکہ بندی عائد کر دی گئی ہے، جبکہ ایران کے خلاف آپریشنز میں امریکا کو ویتنام جنگ جیسا جانی نقصان نہیں اٹھانا پڑا۔