پاکستان روس کے ساتھ عوامی روابط مضبوط بنانے کیلئے تیار ہے، فیصل نیاز ترمذی

پاکستان اور روس نے ثقافت، تعلیم، نوجوانوں کے تبادلوں اور عجائب گھروں کے شعبوں میں دوطرفہ تعلقات کو مزید وسعت دینے کے عزم کا اعادہ کیا ہے۔ روس میں پاکستان کے سفیر فیصل نیاز ترمذی نے جمہوریہ تاتارستان کے دارالحکومت کازان میں “عوامی سفارت کاری کے نمونے کے طور پر مشرقی بازار” کے عنوان سے منعقدہ گول میز کانفرنس سے خطاب کرتے ہوئے کہا کہ پاکستان، روس کے ساتھ تعلیمی اور ثقافتی روابط مضبوط بنانے کے لیے مکمل طور پر تیار ہے۔ انہوں نے اعادہ کیا کہ پاکستانی سفارت خانہ بین الاقوامی ثقافتی میلے ’’روس مشرق‘‘ میں ملک کے فنون، روایات اور قومی ورثے کی بھرپور نمائندگی کرے گا۔ سفیرِ پاکستان نے کازان کریملن میں مسجد اور گرجا گھر کے جوار کو بین المذاہب رواداری کی بہترین مثال قرار دیتے ہوئے دونوں خطوں کے اسلامی اور تاریخی ورثے کی مماثلتوں کو اجاگر کیا۔ کانفرنس کے شرکاء نے عوامی سفارت کاری کے فروغ کے لیے تعلیمی، سائنسی اور سینما کے شعبوں میں باہمی تبادلوں کو وقت کی اہم ضرورت قرار دیا۔