ٹیم جس جوش و جذبے سے کھیلی، اس کی مثال نہیں ملتی,وزیراعظم

وزیراعظم شہباز شریف سے انڈر 19 ایشیا کرکٹ کپ جیتنے والی پاکستانی ٹیم نے ملاقات کی، جس کے دوران وزیراعظم نے تمام کھلاڑیوں کے لیے فی کس ایک کروڑ روپے انعام کا اعلان کیا۔ وزیراعظم کی جانب سے ایشین انڈر 19 چیمپئن ٹیم کے اعزاز میں استقبالیہ بھی دیا گیا، جس میں چیئرمین پی سی بی محسن نقوی، وفاقی وزرا اور کابینہ ارکان شریک تھے۔

وزیراعظم نے فرداً فرداً کھلاڑیوں سے مصافحہ کیا اور بھارت کے خلاف شاندار کارکردگی پر ٹیم کی بھرپور حوصلہ افزائی کی۔ اس موقع پر ٹیم منیجمنٹ کے ہر رکن کے لیے 25،25 لاکھ روپے انعام کا بھی اعلان کیا گیا۔ شہباز شریف نے کہا کہ آپ نے پوری دنیا میں پاکستان کا نام روشن کیا اور بدترین شکست دے کر قوم کے دل جیت لیے۔

وزیراعظم نے کہا کہ کل ٹیم جس جوش و جذبے سے کھیلی، اس کی مثال نہیں ملتی، پوری قوم کو آپ پر فخر ہے۔ انہوں نے امید ظاہر کی کہ یہی ٹیم جلد انڈر 19 ورلڈ کپ بھی پاکستان لائے گی اور پی سی بی کو ہدایت دی کہ کھلاڑیوں کو ہر ممکن سہولت فراہم کی جائے۔

وزیراعظم نے کہا کہ ان میں سے کئی کھلاڑی مستقبل میں قومی ٹیم کا حصہ بنیں گے۔ اس موقع پر سمیر منہاس کو بہترین کارکردگی پر خصوصی شاباش دی گئی، جبکہ محسن نقوی کو پی سی بی کے امور احسن طریقے سے چلانے پر مبارکباد دی گئی۔

استقبالیے کے بعد کھلاڑیوں کے اعزاز میں ظہرانہ دیا گیا، وزیراعظم نے کھلاڑیوں کے ساتھ بیٹھ کر کھانا کھایا اور غیر رسمی گفتگو بھی کی۔ کھلاڑیوں نے عزت افزائی پر وزیراعظم اور عوام کا شکریہ ادا کیا۔

بعد ازاں پریس کانفرنس میں ہیڈ کوچ شاہد انور نے بتایا کہ ٹیم کی تیاری کا عمل 17 جون 2025 سے شروع ہوا، جس میں 70 کھلاڑیوں کے ٹرائلز کے بعد 30 رکنی کیمپ لگایا گیا۔ سابق کپتان سرفراز احمد نے کہا کہ ٹیم اور کوچنگ اسٹاف نے انتھک محنت کی، جبکہ وزیراعظم نے نوجوان کھلاڑیوں کی بھرپور حوصلہ افزائی کی ہے۔

کپتان فرحان یوسف نے ٹیم ورک کو کامیابی کی کنجی قرار دیا، جبکہ اسٹار بلے باز سمیر منہاس نے کہا کہ ان کا سادہ پلان وکٹ پر وقت گزارنا اور ٹیم کے لیے رنز بنانا تھا، اللہ نے عزت دی اور ٹیم نے بہترین کارکردگی دکھائی۔