ایرانی سپریم لیڈر کی امریکا کیساتھ ’’نہ جنگ، نہ امن‘‘ کی صورتحال ختم کرنے کی ہدایت

ایران کے صدر مسعود پزشکیان نے انکشاف کیا ہے کہ سپریم لیڈر آیت اللہ سید مجتبیٰ خامنہ ای نے امریکی تنازع کے حوالے سے قائم “نہ جنگ، نہ امن” کی صورتحال کو باوقار انداز میں ختم کرنے کی ہدایت جاری کی ہے۔ ایرانی صدر کے مطابق سپریم لیڈر نے واضح کیا ہے کہ اگر مذاکرات کے ذریعے ایران کے تمام بنیادی حقوق حاصل کیے جا سکتے ہیں تو جنگ سے مکمل گریز کرنا چاہیے، تاہم ایران کسی بھی قسم کی دھمکی، دباؤ یا طاقت کے استعمال کے سامنے ہرگز سر تسلیم خم نہیں کرے گا۔ انہوں نے تاکید کی کہ تہران برابری اور انصاف کی بنیاد پر بات چیت کا حامی ہے لیکن کسی قسم کی زبردستی کو قبول نہیں کرے گا اور اپنی ملکی خودمختاری و دفاع کے لیے قومی صلاحیتوں پر ہی انحصار برقرار رکھے گا۔ اپنے خطاب میں صدر پزشکیان نے اندرونی حالات کے پیشِ نظر توانائی کے مؤثر استعمال اور پٹرول، بجلی اور گیس کی بچت پر بھی زور دیا۔