بنگلادیش نے حسینہ واجد کی پاسپورٹ کی درخواست مسترد کر دی

بنگلہ دیشی عبوری حکومت نے بھارت میں مقیم سابق وزیراعظم شیخ حسینہ واجد کی نئے شناختی کارڈ اور پاسپورٹ کے اجراء کی درخواست باضابطہ طور پر مسترد کر دی ہے۔ بنگلہ دیش کے وزیر مملکت برائے خارجہ امور ہمایوں کبیر نے میڈیا سے گفتگو کرتے ہوئے واضح کیا کہ ان کا ملک کسی مفرور مجرم یا دہشت گرد کو پاسپورٹ جاری نہیں کرتا۔ انہوں نے کہا کہ دونوں ممالک کے درمیان مجرموں کی حوالگی کا معاہدہ موجود ہے، لہٰذا نئی دہلی کو چاہیے کہ وہ سزا یافتہ حسینہ واجد کو ڈھاکا کے حوالے کرے۔ دوسری جانب بھارت میں جلاوطنی کاٹنے والی شیخ حسینہ واجد نے برطانوی خبر رساں ادارے رائٹرز سے گفتگو میں بنگلہ دیش واپس آ کر عدالتوں کا سامنا کرنے کے عزم کا اظہار کیا ہے، جبکہ ان کے معاونین کا کہنا ہے کہ قانونی کارروائیاں مکمل ہونے پر حتمی تاریخ کا اعلان کیا جائے گا۔ واضح رہے کہ گزشتہ برس نومبر میں بنگلہ دیش کی خصوصی عدالت نے طلبہ کے احتجاج پر پرتشدد کریک ڈاؤن کے الزام میں سابق وزیراعظم کو ان کی عدم موجودگی میں سزائے موت سنائی تھی، تاہم وہ ان الزامات کو یکسر مسترد کرتی رہی ہیں۔