یومِ اقبال پر شاعرِ مشرق کو خراجِ عقیدت پیش کرنے کی قرارداد پنجاب اسمبلی میں جمع

شاعرِ مشرق اور مفکرِ پاکستان ڈاکٹر علامہ محمد اقبالؒ کو ان کی عظیم قومی، علمی اور فکری خدمات پر خراجِ عقیدت پیش کرنے کے لیے پنجاب اسمبلی میں ایک قرارداد جمع کرا دی گئی ہے۔ مسلم لیگ (ن) کی رکنِ پنجاب اسمبلی حنا پرویز بٹ کی جانب سے جمع کرائی گئی اس قرارداد کے متن میں کہا گیا ہے کہ علامہ اقبالؒ نے اپنے فلسفۂ خودی اور شاعری کے ذریعے برصغیر کے مسلمانوں میں بیداری، اتحاد اور آزادی کا نیا شعور بیدار کیا، اور قیامِ پاکستان کے لیے ان کا فکری کردار تاریخ میں سنہرے حروف سے درج ہے۔ قرارداد کے ذریعے پنجاب حکومت سے مطالبہ کیا گیا ہے کہ صوبے کے تعلیمی اداروں میں افکارِ اقبالؒ اور فلسفۂ خودی کے فروغ کے لیے خصوصی تقریبات اور آگاہی پروگرامز ترتیب دیے جائیں تاکہ نئی نسل کو حکیم الامت کے افکار اور نظریات سے روشناس کرا کے ملک کو ترقی و استحکام کی راہ پر گامزن کیا جا سکے۔