ضمنی انتخابات میں عوام نے مریم نواز کی کارکردگی پر اعتماد کا اظہار کیا: عظمیٰ بخاری

وزیر اطلاعات پنجاب عظمیٰ بخاری نے کہا ہے کہ ضمنی انتخابات میں عوام نے وزیراعلیٰ مریم نواز کی کارکردگی اور عوامی خدمت پر اعتماد کا اظہار کرتے ہوئے مسلم لیگ (ن) کے امیدواروں کو فتح سے ہمکنار کیا ہے۔ گوجرانوالہ اور چیچہ وطنی سے کامیاب ہونے والے مسلم لیگ (ن) کے امیدواروں راشد بشیر ورک اور اسد حنیف جٹ کو مبارکباد دیتے ہوئے ان کا کہنا تھا کہ مسلم لیگ (ن) عوام کی پہلی ترجیح بن چکی ہے۔ عظمیٰ بخاری نے تحریک انصاف پر الزام عائد کیا کہ اس نے ریاست کی جانب سے کالعدم قرار دی گئی جماعتوں کے ساتھ مل کر انتخاب لڑا، اور سوال اٹھایا کہ دہشت گرد عناصر کے حامی نام تبدیل کر کے الیکشن کمیشن کے عملے کے سامنے کھلے عام سیاسی سرگرمیاں اور مبینہ جعلی ووٹنگ کیسے کر سکتے ہیں۔ انہوں نے الیکشن کمیشن سے ان سرگرمیوں کا فوری نوٹس لینے کا مطالبہ کرتے ہوئے کہا کہ ان تمام تر سازشوں کے باوجود عوام نے تشدد کے بیانیے کو رد کر کے ترقی کی سیاست کو منتخب کیا ہے۔