علامہ اقبال کا پیغام مظلوم اقوام کے لیے امید، حوصلے اور آزادی کی نوید ہے، افتخار گیلانی

وزیراعظم آزاد کشمیر افتخار گیلانی نے شاعرِ مشرق علامہ محمد اقبالؒ کے یومِ ولادت کے موقع پر اپنے خصوصی پیغام میں کہا ہے کہ حکیم الامت کا فکر و فلسفہ دنیا بھر کی مظلوم اقوام کے لیے امید اور آزادی کی نوید ہے۔ انہوں نے اس بات پر زور دیا کہ علامہ اقبالؒ کا بنیادی تعلق سرزمینِ جموں و کشمیر سے تھا اور یہ ریاست ان کے پیش کردہ تصورِ پاکستان کا ایک لازمی اور ناقابلِ تنصیف حصہ ہے۔ وزیراعظم آزاد کشمیر نے کہا کہ مقبوضہ کشمیر میں بھارتی مظالم اور انسانی حقوق کی سنگین پامالیاں کشمیریوں کے جذبہِ حریت کو پست کرنے میں ناکام رہی ہیں، اور کشمیری عوام اپنی مسلسل جدوجہد و قربانیوں کے ذریعے بالآخر آزادی کی منزل حاصل کر کے رہیں گے۔ ان کا مزید کہنا تھا کہ قائد اعظم محمد علی جناحؒ نے فکرِ اقبالؒ کو پاکستان کی صورت میں عملی تعبیر دی، اور آنے والی نسلوں کے لیے بھی اقبالؒ کی تعلیمات مشعلِ راہ ہیں۔