سینیگال کے ساحل کے قریب تارکین وطن کی کشتی ڈوب گئی، 21 افراد ہلاک

مغربی افریقی ملک سینیگال کے ساحل کے قریب غیر قانونی طور پر یورپ جانے کی کوشش کرنے والے تارکینِ وطن کی کشتی ڈوبنے سے کم از کم 21 افراد ہلاک ہو گئے ہیں، جبکہ ایک شخص کو زندہ بچا لیا گیا ہے۔ غیر ملکی خبر رساں ادارے کے مطابق سینیگال کی وزارتِ داخلہ نے اپنے بیان میں تصدیق کی ہے کہ یہ افسوسناک حادثہ دارالحکومت ڈاکار سے تقریباً 180 کلومیٹر شمال میں ساحل کے قریب پیش آیا۔ امدادی ٹیموں نے سمندر سے 21 لاشیں نکال کر ایک شخص کو بحفاظت منتقل کر دیا ہے، تاہم کشتی میں سوار افراد کی کل تعداد تاحال معلوم نہیں ہو سکی جس کے باعث مزید ممکنہ survivors کی تلاش کے لیے سمندر میں ریسکیو آپریشن جاری ہے۔ واضح رہے کہ ہر سال بڑی تعداد میں افریقی تارکینِ وطن اسپین کے کینری جزائر پہنچنے کے لیے انتہائی خطرناک سمندری راستے کا انتخاب کرتے ہیں، جہاں کشتی رانی کے اس غیر محفوظ سفر میں ہزاروں افراد اپنی جانیں گنوا چکے ہیں۔