کسی بھی دورے کے دوران مارکیٹیں اور کاروبار بند نہ کئے جائیں، مریم نواز کی حکام کو ہدایت

وزیراعلیٰ پنجاب مریم نواز شریف نے انتظامیہ اور پولیس حکام کو واضح ہدایت جاری کی ہے کہ ان کے کسی بھی دورے کے باعث کوئی مارکیٹ، دکان، کاروبار یا تجارتی ادارہ بند نہیں کیا جائے گا اور نہ ہی شہریوں کو اپنی معمول کی سرگرمیاں معطل کرنے پر مجبور کیا جائے گا۔ سماجی رابطے کے پلیٹ فارم ایکس (ٹویٹر) پر اپنے ایک بیان میں وزیراعلیٰ پنجاب نے بتایا کہ یہ احکامات تمام آر پی اوز، ڈی پی اوز، کمشنرز اور ڈپٹی کمشنرز کو دوبارہ ارسال کر دیے گئے ہیں۔ انہوں نے ہدایت کی کہ سیکیورٹی کے نام پر کسی رہائشی گلی کو سیل کیا جائے اور نہ ہی عوام کی نقل و حرکت پر کوئی پابندی لگائی جائے، بلکہ تمام سیکیورٹی انتظامات خفیہ اور غیر محسوس انداز میں کیے جائیں تاکہ شہریوں کو خلل کا سامنا نہ کرنا پڑے۔ مریم نواز نے خبردار کیا کہ ان احکامات پر روح کے مطابق عمل درآمد یقینی بنایا جائے اور کسی بھی قسم کی خلاف ورزی پر سخت قانونی و انتظامی کارروائی عمل میں لائی جائے گی۔