ایران کیخلاف کسی بھی طاقت کا اتحاد ناکامی سے دوچار ہوگا: ترجمان ایرانی فوج

ایرانی مسلح افواج کے ترجمان ابوالفضل شکارچی نے امریکی پالیسیوں کو شدید تنقید کا نشانہ بناتے ہوئے کہا ہے کہ ایران کے خلاف کسی بھی طاقت کا اتحاد ناکامی سے دوچار ہوگا۔ انہوں نے دعویٰ کیا کہ امریکی صدر ڈونلڈ ٹرمپ اور ان کے سخت گیر ساتھی ایران کو نقصان پہنچانے کے عزم کے ساتھ آئے تھے لیکن بالآخر خود اسٹریٹجک بحران کا شکار ہو گئے ہیں۔ ابوالفضل شکارچی کا مزید کہنا تھا کہ امریکہ اس وقت مشرقِ وسطیٰ میں مکمل ڈیڈ لاک کا سامنا کر رہا ہے اور امریکی انتخابات میں ری پبلکنز اور ٹرمپ انتظامیہ کی شکست ایران کے خلاف ان کی ناکام حکمتِ عملی کا نتیجہ ہے۔ ترجمان ایرانی فوج نے موقف اختیار کیا کہ امریکی جارحیت، دہشت گردی اور دباؤ کی پالیسیوں نے وائٹ ہاؤس کی طاقت کی بنیادوں کو ہلا کر رکھ دیا ہے۔