این اے 77 گوجرانوالہ اور پی پی 203 چیچہ وطنی میں ضمنی الیکشن کیلئے پولنگ کا آغاز

پنجاب کے دو اہم حلقوں میں ضمنی انتخابات کا دنگل سج گیا ہے، جہاں قومی اسمبلی کے حلقہ این اے 77 گوجرانوالہ اور پنجاب اسمبلی کے حلقہ پی پی 203 چیچہ وطنی میں رائے دہی کے لیے پولنگ کا آغاز ہو چکا ہے۔

الیکشن کمیشن کے مطابق پولنگ کا عمل کسی وقفے کے بغیر شام 5 بجے تک بلا تعطل جاری رہے گا۔ قومی اسمبلی کے حلقہ این اے 77 گوجرانوالہ میں مجموعی طور پر 333 پولنگ اسٹیشنز اور 963 پولنگ بوتھ قائم کیے گئے ہیں، جبکہ 11 امیدوار الیکشن میں مدمقابل ہیں۔ اس حلقے میں مسلم لیگ (ن) کی جانب سے مرحوم رکن قومی اسمبلی محمود بشیر ورک کے بیٹے راشد بشیر ورک میدان میں ہیں؛ یہ نشست محمود بشیر ورک کے انتقال کے باعث خالی ہوئی تھی۔

دوسری جانب، صوبائی اسمبلی کے حلقہ پی پی 203 چیچہ وطنی میں بھی ضمنی انتخاب کے لیے پولنگ کا عمل جاری ہے، جہاں 2 لاکھ 58 ہزار 122 ووٹرز اپنا حقِ رائے دہی استعمال کر رہے ہیں۔ دونوں حلقوں میں امن و امان کی صورتحال برقرار رکھنے کے لیے سیکیورٹی کے انتہائی سخت اور جامع انتظامات کیے گئے ہیں۔