انتونیو گوتریس کا انروا کیلئے مکمل فنڈنگ کا مطالبہ، فلسطینیوں کی خدمات جاری رکھنے پر زور

اقوام متحدہ کے سیکرٹری جنرل انتونیو گوتریس نے فلسطینی پناہ گزینوں کے لیے قائم امدادی ادارے ‘انروا’ (UNRWA) کے تحفظ اور اس کی ریلیف سرگرمیاں جاری رکھنے کے پختہ عزم کا اعادہ کرتے ہوئے عالمی برادری سے ادارے کو درپیش مالی بحران سے نکالنے کے لیے مکمل فنڈنگ فراہم کرنے کا مطالبہ کیا ہے۔

اقوام متحدہ کے ترجمان کے مطابق سیکرٹری جنرل نے انروا کی خدمات کو انتہائی اہم اور ناقابلِ متبادل قرار دیتے ہوئے کہا کہ اس وقت فلسطینی پناہ گزینوں کی مدد کا تسلسل قائم رکھنا ناگزیر ہے۔

دوسری جانب، مقبوضہ مغربی کنارے کے بلاطہ پناہ گزین کیمپ میں انروا کی جانب سے خدمات میں کی جانے والی کٹوتیوں، ملازمین کی ممکنہ برطرفیوں اور قلقیلیہ میں ادارے کے اسپتال کی بندش کے خدشات کے خلاف شدید احتجاجی مظاہرہ کیا گیا۔ فلسطین لبریشن آرگنائزیشن (PLO) کے محکمہ امورِ مہاجرین، پناہ گزین کیمپوں کی سروس کمیٹیوں اور فتح تحریک کے زیرِ اہتمام منعقدہ مظاہرے کے شرکاء نے انروا کی ریلیف سرگرمیوں میں کسی بھی قسم کی کٹوتی کو مسترد کرتے ہوئے فلسطینیوں کے لیے صحت، تعلیم اور بنیادی امداد کی فراہمی بلا تعطل جاری رکھنے اور ادارے کو مستقل مالی معاونت دینے کا مطالبہ کیا۔