جو شہر پال رہا ہے اسے زندہ رہنے دیں، کراچی پر بھی کرم نوازی کریں: خالد مقبول

وفاقی وزیر اور متحدہ قومی موومنٹ (ایم کیو ایم) پاکستان کے رہنما ڈاکٹر خالد مقبول صدیقی نے کہا ہے کہ جو شہر پورے ملک کی معیشت کا بوجھ اٹھا رہا ہے اور اسے پال رہا ہے، اسے زندہ رہنے دیا جائے اور پاکستان کے معاشی دل کراچی پر بھی بالاخر کوئی کرم نوازی کی جائے۔

اپنے ایک اہم بیان میں خالد مقبول صدیقی نے واضح کیا کہ ان کی جماعت کا تعلق جاگیردارانہ نظام یا موروثی سیاست سے نہیں ہے اور نہ ہی وہ سیاست کو کسی کاروبار کے طور پر چلاتے ہیں بلکہ ان کے نزدیک سیاست خالصتاً عوام کی خدمت کا نام ہے۔ انہوں نے کہا کہ ملک پر ایک مخصوص طبقہ قابض ہے اور ایم کیو ایم کا مقابلہ ایک ایسی سوچ سے ہے جو تعلیم اور عوام کی ترقی کی مخالف ہے۔

وفاقی وزیر نے کے الیکٹرک اور توانائی کے بحران پر تنقید کرتے ہوئے مزید کہا کہ آج بجلی غریبوں کے گھروں سے نکل کر امیروں کے محلوں کو روشن کر رہی ہے، جبکہ کے الیکٹرک کی بجلی عام اور غریب شہریوں کی پہنچ سے دور ہوتی جا رہی ہے۔