ضمنی انتخاب این اے 77: عطاء اللہ تارڑ کو ضابطۂ اخلاق کی خلاف ورزی پر نوٹس جاری

ضلعی مانیٹرنگ آفیسر الیکشن کمیشن نے قومی اسمبلی کے حلقہ این اے 77 گوجرانوالہ کے ضمنی انتخاب میں انتخابی ضابطۂ اخلاق کی مبینہ خلاف ورزی پر وفاقی وزیر اطلاعات عطاء اللہ تارڑ کو نوٹس جاری کر دیا ہے۔ ترجمان صوبائی الیکشن کمشنر پنجاب کے مطابق عطاء اللہ تارڑ کو مسلم لیگ (ن) کے امیدوار کی انتخابی مہم میں شرکت کرنے پر نوٹس دیتے ہوئے 8 نومبر کو صبح 11 بجے ڈسٹرکٹ الیکشن کمشنر کے سامنے پیش ہونے کی ہدایت کی گئی ہے۔ ڈسٹرکٹ الیکشن کمشنر سید باسط علی نے بتایا کہ وفاقی وزراء کا انتخابی مہم میں حصہ لینا الیکشنز ایکٹ 2017 کے سیکشن 182 اور ضابطۂ اخلاق کے پیراگراف 18 اور 41 کی خلاف ورزی ہے۔ نوٹس میں واضح کیا گیا ہے کہ اگر مقررہ وقت پر جواب جمع نہ کرایا گیا تو عدم پیشی کی صورت میں دستیاب ریکارڈ کی بنیاد پر قانونی کارروائی کا فیصلہ کیا جائے گا۔