چینی سرمایہ کاروں کی گورنر خیبرپختونخوا سے ملاقات، سرمایہ کاری میں اظہار دلچسپی

گورنر خیبرپختونخوا فیصل کریم کنڈی سے چینی سرمایہ کاروں کے ایک وفد نے گورنر ہاؤس پشاور میں ملاقات کی، جس میں پاکستان پیپلز پارٹی کے رکن صوبائی اسمبلی ارباب زرک بھی موجود تھے۔ ملاقات کے دوران گورنر فیصل کریم کنڈی نے کہا کہ خیبرپختونخوا قدرتی وسائل اور معدنی ذخائر سے مالا مال ہے اور یہاں معدنیات سمیت مختلف شعبوں میں سرمایہ کاری کے وسیع مواقع دستیاب ہیں۔ انہوں نے چینی سرمایہ کاروں کو صوبے کے اکنامک زونز سے بھرپور استفادہ کرنے کی دعوت دیتے ہوئے یقین دہانی کرائی کہ خیبرپختونخوا میں سرمایہ کاری کرنے والے غیر ملکی اور چینی سرمایہ کاروں کو تمام تر ممکنہ سہولیات اور مکمل تعاون فراہم کیا جائے گا۔ انہوں نے سرمایہ کاری کے فروغ اور مشترکہ منصوبوں پر پیش رفت کے لیے قابلِ عمل تجاویز مرتب کرنے کی ضرورت پر بھی زور دیا۔