امریکا کی ایران کو امداد فراہمی کرنیوالی کینیڈا میں قائم 8 مالیاتی کمپنیوں پر پابندیاں عائد

امریکا نے کینیڈا میں قائم 8 مالیاتی خدمات فراہم کرنے والی کمپنیوں پر ایرانی حکومت کو مالی سہولیات اور فنڈز کی منتقلی میں مدد فراہم کرنے کے الزام میں شدید پابندیاں عائد کر دی ہیں۔

امریکی محکمہ خزانہ کے مطابق، کینیڈا میں رجسٹرڈ ان کمپنیوں نے ایرانی حکومت کے لیے اندرون اور بیرونِ ملک رقوم کی نقل و حرکت میں کلیدی اور غیر قانونی کردار ادا کیا۔ انکشاف کیا گیا ہے کہ یہ کمپنیاں ایرانی ریال اور دیگر بین الاقوامی کرنسیوں کے بدلے ڈیجیٹل اثاثوں (کرپٹو کرنسی و دیگر اثاثوں) کے تبادلے کی سہولت فراہم کر رہی تھیں۔ امریکی حکام نے سخت موقف اپناتے ہوئے واضح کیا کہ کینیڈا کو کسی صورت ایرانی حکومت کے مالیاتی سہولت کاروں کی محفوظ پناہ گاہ نہیں بننے دیا جا سکتا۔

امریکی وزیر خزانہ اسکاٹ بیسنٹ (Scott Bessent) نے اس اہم کارروائی پر گفتگو کرتے ہوئے کہا کہ امریکی انتظامیہ ایرانی حکومت کو اقتصادی پابندیوں سے بچانے اور غیر قانونی مالی راستے فراہم کرنے والے تمام عناصر اور بین الاقوامی اداروں کے خلاف بلا امتیاز سخت قانونی و معاشی کارروائی جاری رکھے گی۔