عراق کا امریکی فوج کو اپنی سرزمین ہمسایہ ممالک کیخلاف حملوں کیلئے دینے سے انکار

عراق نے امریکہ کی جانب سے فوجی مقاصد کے لیے اپنی سرزمین کی فراہمی کا مطالبہ رد کرتے ہوئے امریکی فوج کو کسی بھی ہمسایہ ملک کے خلاف حملوں کے لیے عراقی زمین دینے سے واضح طور پر انکار کر دیا ہے۔

امریکی صدر ڈونلڈ ٹرمپ اور عراقی حکام کے درمیان ہونے والے رابطہ کے بعد سامنے آنے والی تفصیلات کے مطابق، عراقی نمائندے علی الزیدی نے موقف اختیار کیا ہے کہ عراق کی سرزمین کو خطے کے کسی بھی ہمسایہ ملک پر حملے کے لیے استعمال کرنے کی ہرگز اجازت نہیں دی جائے گی۔ عراقی انتظامیہ نے واضح کیا کہ ملک کو علاقائی تنازعات اور جنگ کی آگ میں دھکیلنے کے اقدامات قبول نہیں کیے جائیں گے۔

دوسری جانب، امریکی صدر ڈونلڈ ٹرمپ نے امیرِ قطر شیخ تمیم بن حمد الثانی سے بھی ٹیلی فونک رابطہ کیا ہے۔ گفتگو کے دوران مشرقِ وسطیٰ کے بحران کے خاتمے، کشیدگی میں کمی اور ایران و امریکہ کے درمیان ممکنہ معاہدے کے لیے قطر کے ثالثی کے کردار پر تفصیلی بات چیت کی گئی۔