پاکستان، برطانیہ کا انسداد دہشتگردی، سائبر کرائم، امیگریشن میں تعاون بڑھانے پر اتفاق

پاکستان اور برطانیہ کے درمیان انسدادِ دہشت گردی، سائبر کرائم، امیگریشن اور مختلف دوطرفہ شعبوں میں باہمی تعاون کو مزید بڑھانے پر مکمل اتفاق ہو گیا ہے۔

یہ پیش رفت برطانوی وزیر مملکت برائے سیکیورٹی ڈین جاروس (Dan Jarvis) کے دورۂ وزارتِ داخلہ کے موقع پر سامنے آئی، جہاں انہوں نے وفاقی وزیر داخلہ محسن نقوی اور وزیر مملکت طلال چوہدری سے اہم ملاقات کی۔ اس موقع پر دونوں ممالک کے درمیان وفود کی سطح پر تفصیلی مذاکرات کا انعقاد کیا گیا۔

مذاکرات کے دوران برطانوی وزیر مملکت سیکیورٹی نے غیر قانونی امیگریشن کی موثر روک تھام کے لیے ایف آئی اے (FIA) کی کارکردگی کو سراہا اور دہشت گردی کے خلاف جنگ میں پاکستان کی عظیم قربانیوں کا کھلے دل سے اعتراف کیا۔ دونوں ممالک نے انسدادِ منشیات سے متعلق مفاہمتی یادداشت (MoU) کو جلد حتمی شکل دینے کا فیصلہ کیا اور پاکستان و برطانیہ کی وزارتِ داخلہ کے درمیان قائم جوائنٹ ورکنگ گروپ کا اجلاس جلد بلانے پر بھی اتفاق کیا۔