روس میں بٹ کوائن سمیت 3 کرپٹو کرنسیوں کی خریداری کی اجازت دینے کا فیصلہ

روس کے مرکزی بینک نے عام سرمایہ کاروں کو کرپٹو کرنسیوں میں سرمایہ کاری کی اجازت دینے کا فیصلہ کرتے ہوئے تین اہم ڈیجیٹل کرنسیوں بٹ کوائن، ایتھیریم اور ٹیتھر (USDT) کی فہرست جاری کر دی ہے، جن کی خرید و فروخت غیر پیشہ ور سرمایہ کار بھی کر سکیں گے۔ بینک آف رشیا کے مطابق نئی ہدایات 17 نومبر 2026 سے نافذ العمل ہوں گی، جن کے تحت روسی ایکسچینجز اور مالیاتی واسطوں کے ذریعے ان اثاثوں کا کاروبار کیا جا سکے گا۔ مرکزی بینک نے واضح کیا ہے کہ سرمایہ کاری کے خواہشمند ہر فرد (عام یا پیشہ ور) کو ٹیسٹ پاس کرنا اور مالی خطرات سے آگاہ ہونا لازمی ہوگا، جبکہ پانچ سالہ تاریخی ریکارڈ اور قانونی معیار پر پوری اترنے والی ان کرنسیوں کا مقصد عام سرمایہ کاروں کو زیادہ خطرے والے اثاثوں سے محفوظ رکھنا ہے۔ پیشہ ور سرمایہ کاروں کو دیگر کرپٹو اثاثوں میں بھی سرمایہ کاری کی مکمل سہولت حاصل ہوگی۔