پاکستان اور روس کا آئی ٹی، مصنوعی ذہانت اور جدید کمپیوٹنگ میں تعاون بڑھانے پر اتفاق

پاکستان اور روس کے درمیان انفارمیشن ٹیکنالوجی، مصنوعی ذہانت، سیمی کنڈکٹرز، سائبر سیکیورٹی اور کوانٹم کمپیوٹنگ کے شعبوں میں تعاون کو فروغ دینے کے لیے اہم اتفاقِ رائے ہوا ہے۔ اسلام آباد میں پاکستان سافٹ ویئر ایکسپورٹ بورڈ (PSEB) اور روس کی یونیورسٹی آف ورلڈ سویلائزیشنز کے اشتراک سے منعقدہ اعلیٰ سطح کے ویبینار کی صدارت کرتے ہوئے وفاقی وزیر منصوبہ بندی احسن اقبال نے کہا کہ پاکستانی شباب کی صلاحیتیں اور روس کی انجینئرنگ مہارت مل کر اہم پیش رفت ثابت ہوں گی۔ انہوں نے واضح کیا کہ ‘اڑان پاکستان’ میں ‘ای پاکستان’ معاشی تبدیلی کا بنیادی ستون ہے جس کا مقصد 2035 تک پاکستان کی معیشت کو ایک ٹریلین ڈالر تک پہنچانا ہے۔ ویبینار کے دوران دونوں ممالک کی کمپنیوں کے درمیان مشترکہ منصوبوں، سرمایہ کاری اور نئی عالمی منڈیوں تک رسائی کی تجاویز کا تبادلہ کیا گیا۔