پاکستان اور تاجک افواج کی مشترکہ انسدادِ دہشتگردی مشق دوستی سوئم کامیابی سے مکمل

پاکستان اور تاجکستان کی مسلح افواج کے درمیان انسدادِ دہشت گردی کی مشترکہ عسکری مشق ‘دوستی سوئم’ کامیابی کے ساتھ اختتام پذیر ہو گئی ہے۔

پاک فوج کے شعبہ تعلقاتِ عامہ (آئی ایس پی آر) کے مطابق یہ مشترکہ عسکری مشقیں اسپیشل آپریشنز اسکول چراٹ میں منعقد کی گئیں، جن کا باقاعدہ آغاز 26 اکتوبر 2026 کو ہوا تھا۔ مشقوں کے دوران دونوں ممالک کے اسپیشل فورسز کے دستوں نے انسدادِ دہشت گردی کے میدان میں اپنے پیشہ ورانہ تجربات اور بہترین عملی طریقہ کار کا تبادلہ کیا۔

آئی ایس پی آر کے مطابق ‘دوستی سوئم’ کا بنیادی فوکس عملی آپریشنل ڈرلز، تزویراتی طریقہ کار اور جنگی مہارتوں کو مزید نکھارنے اور مؤثر بنانے پر تھا۔ اس مشق نے دونوں دوست ممالک کے مابین دیرینہ اور پائیدار دفاعی تعاون کو مزید مضبوط کیا ہے۔ اختتامی مرحلے پر پاکستان اور تاجکستان کے عسکری حکام نے دوطرفہ دفاعی تعلقات اور ملٹری ٹریننگ کے شعبے میں تعاون کو مزید وسعت دینے کے عزم کا اعادہ کیا۔